Dépi an tan nanni nannan
pou yo lajan sé  bon nannan
an sel larel toulong yo ni
sé anni pran neg pou zouti

Pou lapéti lajan bannann
Sé misié-a pa lé sispann
vréyé monté élikoptè
wouzé lanmò asou latè

Anba kalté lapli-tala
Mouch-an-miel ka tonbé léta
nan kò nan dlo andidan tè
sé an sel lablanni kansè

Pou lapéti lajan yo ni
sé misié-a pa lé sispann
vréyé monté élikoptè
wouzé lanmò asou latè

Pannan tan-an yo ka simen
anlo pawol toufé-yenyen
épi  aladous anba fey
wopso flap! ou wè’y ou pa wè’y!

Pou lapéti lajan bannann
sé misié-a pa lé sispann
vréyé monté élikoptè
wouzé lanmò asou latè

Fidji yo tout ka pòté mas
mé dèyè mas sé lagrimas
yo lé kontel an tan lontan
pran nou pou an bann bélévan

Annou sispannn palé palé
palé palé épi palé
lè-a rivé lè-a rivé
ansanm ansanm annou lévé !

 Viré monté